وحشتــــــــــووووووووووووونا...

الي كل من رحلوا وتركونا..الي احباب ذهبوا
الي عيون لم نعد نراها وايادي افتقدنا ملمسها!
الي احضان نشتاق اليها..وذكريات لم ولن ننساها
الي اجمل ما في الامس...
الي اناس مضوا بدون سابق انذار..
ولم نعلم انهم لن يعودوا مرة اخري!!



عيني اشتاقت
والروح بتحن..لحبايب
صور كتير متعلقة
واللي جواها..غايب
برواز خشب
وذكريات..عمري اللي فات
ليالي الونس
وكلام كنا بنقوله
وبنسهر ليلنا بطوله
نتكلم ونسلم ونداوي جراح
دلوقتي بقول فين الافراح..
بيرد الصوت جوايا
زمن الحبايب راح
يااااااااااااااااه
كنا فين وبقينا فين!
وازاي يعيش الواحد علي ذكريات ماتت
طب اروح فين واجي منين....
وحشتونا
وحشتونا يا اغلي الناس..
وجه اليوم اللي عليكوا بنسال
ويقولوا مشيوا خلاص!
طب حتي كنتوا تقولوا
مش علي غفلة تسهونا..
والله وحشتونا
ادي الفراق وعمايله
بيخلي الشبعان بالاهل....وحداني
ويجنن جوانا العقل
ونكلمهم فاكرينهم....هيردوا علينا تاني!!
نرجع نشعر بجراح
ويرد الصوت جوانا
زمن الحبايب............راح
طب كنتوا تقولوا سلام!
طب كنتوا تودعونا
كده برضه يا اغلي امبارح عشناه..
تخلوا بينا وتسبونا
سايبنا ازاي ولمين...!
سايبنا للسنين
الله يمسيكوا بالخير
والله يصبر ده الحنين
مين كان يصدق..
ييجي النهاردة علينا
ونتداري ف اربع حيطان
وقصاد عنينا..مشاهد فيلم زمان
انا مش قصدي اصحي جراح
ولا غاوي عذاب
انا بس صعبت عليا روحي
اصلي بقالي كتير وحداني..
ومحدش خبط ع الباب!!
ياللي مشيتوا
وحياة طعم الشوق..
ابقوا زورونا..وابقوا تعالوا في حلم الليل
ماتخلوش الحلم حزين
اصعب حاجة ان حبيبك..
بعد ماكان من لحم ودم
يبقي يادوب
جوه القبر شوية عضم!!
اسف جدا
علي عيني اصحي جراح عمري
وانبش في قبر اللي سابونا
انا بس اشتقت..
واشتقت اقول وحشتونا!!