لازم نفترق...

وقت لازم نفترق




دِلْوقْتْ لازِمْ نِفتِرِِقْ مِنْ غيرْ كلامْ

منْ غيرْ ما نِخْضعْ لِلمواجِعْ والآلامْ

منْ غيرْ ما أضُمِّكْ .. أوْ أقَرَّبْ حتَّى منِّكْ

مَعَ إنِّى يامَا حْلِمْتْ عَلى إيدِكْ أنامْ




دِلْوقْتْ لازمْ نِفتِرِقْ رغمْ الحنينْ

وبرغمْ أحلامْ الليالى المجْروحينْ

مكتوبْ علينا .. نُخْنُقْ الفَرحه بإيدِينا

وتْضيعْ حياتْنا فْ قَلْبْ مِشْوارْنا الحزينْ




دِلْوقْتْ لازمْ نِفتِرِقْ منْ غيرْ دُمُوعْ

مِنْ غيرْ ما نِحْلمْ أوْ نِفَكَّرْ فى الرُّجوعْ

مِنْ غيرْ ما نِحْكى .. مُشْ حَنِلْحقْ حتَّى نِبْكِى

الوقتْ فاتْ والْبحرْ بيْنادى القُلوعْ




دِلْوقْتْ لازمْ نِفْتِرِقْ مِنْ غيرْ وَداعْ

وِبْدَمِّى حكْتِبْلِك بَحِبِّكْ عَ الشِّراعْ

حَرْسِمْ عِنيكِى .. وْقلْبْ مَدْبوحْ بينْ إيدِيكى

بِيْقولْ لِكْ يومْ ما سِيبْتَكْ عُمْرى ضاعْ .